അതങ്ങനെയാണ്

അതങ്ങനെയാണ്
======================
അവർ
പണ്ടേ പുരോഗമനക്കാരാണ്.
മതത്തിലും രാഷ്ട്രീയത്തിലും
ജീവിതത്തിലും.
അതിനാലാവർ
ഇത്തിരി മുന്നേ പായും.
പഴഞ്ചന്മാരായ ഞങ്ങൾ
പഴമക്കാർ പറഞ്ഞതും പറഞ്ഞു
അങ്ങിനെയങ്ങു പോകും.
എന്നാൽ
അരികത്തെത്തിയാൽ
അവരും ഞങ്ങളും തമ്മിൽ
ഒപ്പത്തിനൊപ്പമാണ്.
അതാണിവിടെ
മതവും രാഷ്ട്രീയവും
പുളിച്ചു പോകാതെ
മധുരിച്ചു നിൽക്കുന്നത്.

ചേതം
==============
അകത്താണ് മഴ
ഇടിയും മിന്നലും അകത്തുതന്നെ
നന്മയും തഴച്ചു വളര്ന്നത്
അകത്താണ്.
അകക്കണ്ണില്ലാത്തതാണ്
ഇന്നെനിക്കുള്ള കഷ്ടം.  

ഇന്നത്തെ വിചാരം 12/09/2015
മാതൃകയായി സി കെ കെ
=========================
ഫീനിക്സ് പക്ഷിയെപ്പോലെയാണ് സി കെ കെ ഉയർന്നു വന്നത്. കച്ചവടത്തിൽ നഷ്ടങ്ങൾ പറ്റി ഇനി ഒരിക്കലും സി കെ കെ എന്ന പേര് ചിത്രത്തിൽ ഉണ്ടാവില്ല എന്ന് കരുതിയവർ അത് തിരുത്തി എഴുതി. ആ സി കെ കെ തന്നെയാണ് നാദാപുരത്തെ മണ്ണിൽ നന്മയുടെ വേറിട്ടൊരു അദ്ധ്യായം എഴുതി ചേർത്തിരിക്കുന്നത്.

മക്കളുടെ കല്യാണം നാടും നഗരവും അറിയിച്ചു കെങ്കേമമായി വിരുന്നൂട്ടി ആർഭാടവും പൊങ്ങച്ചവുമെല്ലാം കാണിച്ചു വീമ്പിളക്കുന്നവർക്കിടയിൽ വരും നാളിലെങ്കിലും ഇത്തരം നന്മ ചെയ്യാൻ മുന്നോട്ട് വരിക എന്നൊരു നല്ല സന്ദേശമാണ് കംഫർട്ട് ട്രാവൽസ് ഉടമ സി കെ കെ അബ്ദുള്ള നാദാപുരക്കാർക്കും മലയാളികൾക്കുമിടയിൽ കാഴ്ച വെച്ചിരിക്കുന്നത്.

തന്റെ മകൾ റുസ്നയുടെ വിവാഹം കോഴിക്കോട് കുറ്റിച്ചിറ പള്ളിയിൽ വെച്ച് നടത്തി അവിടെ വന്നവർക്ക് ഒരു ചായയും കടിയും നൽകി സൽക്കരിച്ച അബ്ദുള്ളയും സാജിതയും അവരുടെ നാദാപുരത്തെ സുരഭി എന്ന ഭവനത്തിൽ അടുത്ത ബന്ധുക്കളെയും അടുത്ത കൂട്ടുകാരെയും നാട്ടിലെ വളരെ വേണ്ടപെട്ടവരെയും ക്ഷണിച്ചു ഒരു വിരുന്നൊരുക്കി അവടെ വച്ച് തന്റെ മകളുടെ വിവാഹത്തിനു വരുന്ന അധിക ചെലവ് വെട്ടിച്ചുരുക്കി സ്വരൂപിച്ച അഞ്ചു ലക്ഷം രൂപ ശ്രീ ഇ കെ വിജയൻ എം എൽ ഏ വഴി നാദാപുരം മേഖലാ പെയിൻ ആൻഡ് പാലിയേറ്റീവ് കഴിഞ്ഞ വർഷം എം ഇ ടി കോളേജിൽ വെച്ച് നടത്തിയ നട്ടെല്ലിനു ക്ഷതമേറ്റ് കിടക്കുന്ന രോഗികളുടെ പുനരധിവാസ ഫണ്ടിലേക്ക് നൽകി നല്ലൊരു സന്ദേശം ഒരു സമൂഹത്തോട് വിളിച്ചു പറഞ്ഞിരിക്കയാണ്.

വലിയൊരു സമ്പന്നനൊന്നുമല്ല സി കെ കെ അബ്ദുള്ള എന്ന് നാം അറിയണം. എന്നാൽ നാദാപുരത്തെ അറിയപ്പെടുന്ന കുടുംബ പാശ്ചാത്തലവും വലിയൊരു സുഹൃത്ത് വലയവും ഉള്ള ഒരു വ്യക്തിയാണ് അബ്ദുള്ള. അതിനാൽ അവരെയെല്ലാം വിളിച്ചു നാടറിയിച്ചൊരു വലിയൊരു കല്യാണം കഴിച്ചു ബാങ്ക് ബാലൻസിൽ നിന്നുമെടുത്തല്ല ഈ അഞ്ചു ലക്ഷം രൂപ ഈയൊരു കാരുണ്യ പ്രവര്ത്തനത്തിനു അദ്ദേഹം നൽകിയത്. കടം വാങ്ങിയും കൊടുക്കാൻ നിർബന്ധിതമായ സംഖ്യ കൊടുക്കാതെയും വലിയ കല്യാണങ്ങൾ നടത്തുന്നവർക്കിടയിൽ തന്റെ മകളുടെ കല്യാണ ചിലവിനു കണക്കാക്കിയ സംഖ്യയിൽ നിന്നും മിച്ചം പിടിച്ചാണ് സി കെ കെ ഈ ധാര്മ്മിക സേവനം നിർവഹിച്ചതെന്നുഅറിഞ്ഞു വേണം ഞാനും നിങ്ങളും ഈ സമൂഹത്തിലൂടെ നടന്നു പോകേണ്ടത്,

മിനിമം പരിപാടി

ഡീസലിന് വിലകൂട്ടുമ്പോള്‍
കീശ കാലിയാകും
കീശ നിറയ്ക്കാനും
കാര്യം നടത്താനും
സാധാരണക്കാരന്‍
നടുവേ ഓടി
നടുവൊടിക്കും.

മിനിമം ചാര്‍ജ്ജ്
ആറാക്കുമ്പോഴും
കരണ്ടുബില്ലില്‍ തൊടുമ്പോള്‍
ഷോക്കടിക്കുന്നതും
ഒരു ഹര്‍ത്താലിലും
ധര്‍ണയിലും
സമാപനം കുറിക്കും.

സമരക്കാര്‍ കുട്ടികളാണ്
അവരുടെ നേരെ
തിരിയാതിരുന്നാല്‍;
മിനിമം എത്രയായാലും !
മാക്സിമമാകാതിരിക്കാന്‍ !!
മുന്നണികളിലൊരു ധാരണ !!!  

നോമ്പുകാരന്‍

റമളാന്‍  
വ്രതമനുഷ്ടിച്ച് 
പാപങ്ങള്‍ 
കഴുകി കളയുന്ന മാസം.

വിശ്വാസത്തിന്‍റെ
ഭാഗമാണിത് 
ഖുറാനും,ഹദീസും 
പറഞ്ഞു തരുന്നിത്.

എന്നാല്‍;

റമളാന്‍ 
ഒന്ന് മുതല്‍ തുടങ്ങും 
നോമ്പ് തുറ സല്‍ക്കാരങ്ങള്‍.
പണ്ഡിതനും,പാമരനും
ഒരേ സുപ്രയില്‍, 
സമ്പന്നതയുടെ 
അകത്തളത്തില്‍.

മഗരിബിനും 
സുബഹിക്കുമിടയില്‍ 
വിഭവങ്ങള്‍ 
മൃഷ്ടാന്നമടിച്ചു
ഏമ്പക്കമിടുന്നവന്‍
നോമ്പുകാരന്‍ 

രാത്രി നമസ്ക്കാരം 
ഉദരത്തിനാശ്വാസമായി
വീണ്ടും വീണ്ടും
തിന്നാനും കുടിക്കാനും 
ഒരു വ്യായാമം.

സക്കാത്തിനെ 
ചക്കാത്താക്കി 
എരപ്പന്മാരെ 
വാര്‍ത്തെടുക്കുന്നതും   
ഈ മാസത്തില്‍.

കര്‍മവും, വചനങ്ങളും 
ദിശമാറിപ്പോകുന്നു 
വിശ്വാസവും, വിശ്വാസിയും 
അതിനാല്‍ .......     

ഐസ് ...ക്രീം

ഇത് 
വല്ലാത്തൊരു 
ഐസ്ക്രീം.


നുണഞ്ഞോ 
അലിഞ്ഞോ 
തീരാത്ത 
ഐസ്ക്രീം.


വെറുപ്പെനിക്കിപ്പോള്‍
ഞാനിതെന്തിനു 
നുണഞ്ഞു.....

പൂവന്‍

കൂകി
ഉറക്കം തെളിയിക്കുന്ന
കോഴികള്‍
ഐസു പെട്ടിയില്‍
സുഖ സുഷുപ്തിയില്‍.. .....

ഇന്ന്
ഞായറാഴ്ച ദിവസം
ഉച്ചയ്ക്ക്
തീന്‍ മേശയില്‍,
പൊരിഞ്ഞ മണവുമായ്
കോഴികള്‍ വരുമ്പോള്‍,
ഉള്ളിലൊരു
കൂകി വിളി വരും
വിശപ്പകറ്റാന്‍
തിന്നാന്‍ വരിക.............

അങ്ങിനെ
ഉച്ചനേരത്ത്
കൂവുന്ന പൂവനായ്......  

ശുഭ ദിനം നേരുന്നു